Hivi Ndivyo Logarusic alivyoingia anga za Maximo Yanga

Mkuu wa Simba, Mcroatia, Zdravko Logarusic. KAZI! Hivi ndivyo utakavyosema msimu h...

Mkuu wa Simba, Mcroatia, Zdravko Logarusic.

KAZI! Hivi ndivyo utakavyosema msimu huu wa Ligi Kuu Bara kutokana na Kocha Mkuu wa Simba, Mcroatia, Zdravko Logarusic kutumia mbinu zinazotumiwa na Mbrazili, Marcio Maximo.

Maximo, tangu atue Yanga, ameonekana akitumia mbinu tatu kuwafundisha wachezaji wake katika kuhakikisha timu yake inapata matokeo mazuri ikiwemo kutwaa ubingwa.

Moja ya mbinu anazozitumia ni kuwatumia mawinga na mabeki katika kushambulia lango la timu pinzani kwa kutumia mipira ya krosi na kona.

Pia kufunga mabao kwa kupiga mashuti ya mita 20 kwenye goli la timu pinzani na kufanya mashambulizi ya kushtukiza ‘counter attacks’.
Katika mazoezi ya hivi karibuni ya Simba yanayoendelea kwenye Uwanja wa Ununio, Boko jijini Dar es Salaam, Logarusic alionekana kutumia mbinu hizo tatu anazozitumia Maximo.

Wakati anaendelea na mazoezi hayo, Logarusic alionekana kuwapa maelekezo hayo kwa kuwataka kabla ya kupiga krosi kuangalia wachezaji wenzao watakaofikiwa.

Mcroatia huyo alionekana akiwapa maelekezo zaidi viungo washambuliaji Uhuru Selemani, Awadhi Juma, Said Ndemla na Shaban Kisiga kupiga krosi hizo.

Zoezi hilo la kupiga krosi liliwajumuisha mabeki wa pembeni wa timu hiyo, Said Nassor ‘Chollo’, Issa Rashidi ‘Baba Ubaya’ na beki mpya kutoka Kagera Sugar, Mohammed Hussein ‘Tshabalala’.
Kocha huyo, alionekana kuwa mkali na kuwafokea wachezaji hao pale walipofanya kinyume na maelekezo.

Hiyo ni dalili tosha kwamba, msimu ujao ushindani utakuwa mkubwa zaidi, hasa Simba na Yanga zitakapokutana.